तनहुँ । रोटर्याक्ट क्लब अफ दमौलीको आयोजनामा बुधबारदेखि ‘प्रथम रोटर्याक्ट कप’ ९ए साइड फुटबल प्रतियोगिता हुने भएको छ । व्यास-३ बिपी बनवाटिकाको खेलमैदानमा हुने प्रतियोगितामा ११ टिमको सहभागीता रहेको खेल संयोजक उमेश पौडेलले जानकारी दिए ।
प्रतियोगितामा विजेता र उपविजेता हुने टिमले क्रमशः बोका र टर्की पुरस्कारसहित मेडल र प्रमाणपत्र पाउने मंगलबार दमौलीमा आयोजित पत्रकार सम्मेलनमा क्लबका अध्यक्ष विशाल श्रेष्ठले बताए ।
प्रतियोगितामा उत्कृष्ट खेलाडी क्लबले नगद १ हजार सहित मेडल र प्रमाणपत्र दिने रोटर्याक्ट क्लब अफ दमौलीका सचिव किरण श्रेष्ठले बताए ।
दसैं तिहारको अवसरमा आयोजना गरिएको फुटबलमा रोटरी क्लब अफ दमौली र नेपाल पत्रकार महासंघ तनहुँ, टिम नेपो र लियो क्लब अफ म्याग्दे, लियो क्लव तनहुँ र सहकारी म्यानेजर टिम, लायन्स क्लब तनहुँ भानुभक्त र जेसिआइ व्यासनगर, एलायन्स क्लब अफ दमौली र रोटर्याक्ट क्लब दमौलीबीच हुनेछ भने डाक्टर टिम बाइ परेको क्लबका पूर्व अध्यक्ष मनोज राउतले बताए ।