इनरव्हिल क्लबद्वारा दमौलीमा महिलाका लागि निःशुल्क पाठेघर क्यान्सर परीक्षण शिविर

दमौली । इनरव्हिल क्लब अफ दमौलीको आयोजनामा शनिबार महिलाका लागि निःशुल्क पाठेघर क्यान्सर परीक्षण शिविर सम्पन्न भएको छ ।

शनिबार तनहुँको व्यास नगरपालिका वडा नं ४ भोर्लेटारचोकस्थित रत्नहरि मेमोरियल अस्पतालमा आयोजित स्वास्थ्य शिविरमा १ सय ५० जना महिलाको पाठेघर क्यान्सर (भीआईए) परीक्षण गरिएको क्लबकी अध्यक्ष नारायणी मल्लले जानकारी दिईन ।

सो शिविरको लागी रत्नहरि मेमोरियल अस्पतालको प्राविधिक सहयोग रहेको क्लबले जनाएको छ । उक्त शिविरमा स्वास्थ्य परीक्षणसँगै महिलाहरूलाई परामर्श पनि प्रदान गरिएको थियो ।

स्वास्थ्य शिविरको उद्घाटन व्यास नगरपालिकाकी उपप्रमुख इन्दिरा दरैले गरिन् । उनले महिलाको स्वास्थ्य सुरक्षाका लागि यस्ता कार्यक्रमले महत्त्वपूर्ण योगदान गर्ने बताउँदै आयोजकहरूलाई धन्यवाद दिइन् ।

क्लबकी केन्द्रीय सदस्य निर्मला मल्लले यस्ता कार्यक्रमहरूले महिलाहरूलाई स्वस्थ जीवनतर्फ अग्रसर गराउन महत्वपूर्ण भूमिका खेल्ने बताइन्। “हाम्रो प्रयासले यहाँका महिलाहरूमा आत्मविश्वास र स्वास्थ्यप्रति सचेतना बढाएको देख्दा गर्व लागेको छ । भविष्यमा पनि यस्ता कार्यक्रमलाई निरन्तरता दिन हामी प्रतिबद्ध छौं,” उनले भनिन् । शिविरमा डा. दिनेश शर्मा र डा. बबिता खड्काको नेतृत्वमा रहेको टोलीले महिलाहरूको स्वास्थ्य जाँच गरेको थियो ।

कार्यक्रममा अस्पताल सञ्चालक समितिका अध्यक्ष ताराप्रसाद श्रेष्ठले ग्रामीण क्षेत्रमा स्वास्थ्य सेवाको पहुँच अभावलाई ध्यानमा राख्दै यस्ता शिविरले महिलाहरूलाई समयमै स्वास्थ्य परीक्षण र परामर्श सेवा दिन सहयोग गरेको बताए । “हाम्रो समुदायमा यस्ता कार्यक्रमहरूको आवश्यकता अझै धेरै छ। यस्ता प्रयासले महिलाहरूको स्वास्थ्य सुधारमा ठुलो मद्दत पुग्नेछ,” उनले भने।

त्यस्तै, चिकित्सक संघ तनहुँका अध्यक्ष डा. रामकुमार श्रेष्ठले पनि शिविरको प्रभावकारितालाई उजागर गर्दै भने, “पाठेघर क्यान्सर जस्ता गम्भीर रोगको पहिचान समयमै भयो भने जीवन बचाउन सकिन्छ । यस्ता शिविरले समुदायमा स्वास्थ्य सेवाको पहुँच विस्तार गर्न मद्दत गर्छ ।”

शिविरमा अस्पतालका व्यवस्थापक लिला बहादुर थापाका अनुसार चेकजाँच गरिएका मध्ये ५ जनामा महिलामा पाठेघर क्यान्सरको प्राथमिक जोखिम देखिएकाले उनीहरूलाई थप उपचारका लागि सिफारिस गरिएको छ । कार्यक्रम क्लबकी अध्यक्ष नारायणी मल्लको अध्यक्षतामा सम्पन्न उक्त शिविरमा क्लबकी उपाध्यक्ष सिर्जना लामिछाने, सचिव सविता श्रेष्ठ लगायतले बोलेका थिए ।