तनहुँ । राष्ट्रिय स्वतन्त्र पार्टीबाट अर्थविद् डा. स्वर्णीम वाग्लेले तनहुँ १ बाट प्रतिनिधिसभा सदस्यका लागि उम्मेदवारी दर्ता गरेका छन् ।
वाग्लेले सोमबार मुख्य निर्वाचन कार्यालय तनहुँ पुगेर ४:११ बजे उम्मेदवारी दर्ता गरेका हुन् ।
उनको प्रस्तावकमा विश्व बास्तोला र समर्थकमा डा.रुपक विक घिमिरे छन् । उनको उम्मेदवारी दर्ता कार्यक्रममा राष्ट्रिय स्वतन्त्र पार्टीका सभापति रवि लामिछाने समेत उपस्थित थिए ।
यसअघि उक्त क्षेत्रमा नेपाली काँग्रेसबाट गोविन्द भट्टराई, नेकपा एमालेको तर्फबाट पूर्वआईजीपी सर्वेन्द्र खनाल, नेपाल मजदुर किसान पार्टीबाट रामप्रसाद प्रजापति र राष्ट्रिय जनमुक्ति पार्टीको तर्फबाट पूर्णबहादुर रानाले उम्मेदवारी दर्ता गराएका छन् ।
गत मंसिरमा भएको निर्वाचनबाट विजयी नेपाली कांग्रेसका रामचन्द्र पौडेल राष्ट्रपति भएपछि उक्त क्षेत्र रिक्त भएको हो । उक्त क्षेत्रमा वैशाख १० गते उपनिर्वाचन तोकिएको छ ।