तनहुँ । प्रतिनिधिसभा सदस्य उपनिर्वाचनअन्तर्गत तनहुँ–१ मा राष्ट्रिय स्वतन्त्र पार्टीका उम्मेदवार डा.स्वर्णिम वाग्लेको जित सुनिश्चितभएको छ ।
सोमबार रातिसम्मको गणनामा वाग्ले निकट्तम प्रतिस्पर्धी कांग्रेस उम्मेदवार गोविन्द भट्टराईभन्दा १२ हजार ७६४ मतले अगाडि रहेका छन्।
आइतबार सम्पन्न उपचुनावअन्तर्गत तनहुँ १ मा गणना जारी छ ।
वाग्लेले ३० हजार २०४ मत प्राप्त गरेका छन् । कुल ६५ हजार ८५ मत खसेको तनहुँ–१ मा कांग्रेस उम्मेदवार भट्टराईले १७ हजार ४४० मत प्राप्त गरेका छन् ।
वाग्ले र भट्टराईबीच रहेको मतान्तरभन्दा कम मत गन्न बाँकी रहेकाले वाग्लेको जित सुनिश्चित भएको हो ।
त्यस्तै तेस्रो स्थानमा रहेका एमालेका सर्वेन्द्र खनालले ७ हजार ९८८ मत प्राप्त गरेका छन् । कुल ४२ वडा रहेको तनहुँ–१ का ३९ वडाकोमतगणना सकिइसकेको छ भने अब ३ वटा वडाको मत गन्न बाँकी रहेको छ ।
व्यास नगरपालिकाका ९, १० र ११ को मतपरिणाम आउन बाँकी छ ।
हालसम्म आँबुखैरेनी, देवघाट, बन्दीपुर गाउँपालिका र भानु नगरपालिकाको मतगणना सकिएको छ ।
अहिले व्यास नगरपालिकाको मतगणना जारी रहेको मुख्य निर्वाचन अधिकृतको कार्यालयले जनाएको छ ।
तनहुँ क्षेत्र नं. १ को मतगणना आइतबार रातिदेखि सुरु भएको हो । सुरुदेखि नै वाग्लेले अग्रता लिइरहेका छन् ।