डुम्रे । आठौं छपेली खुल्ला सेभेन ए साइड नकआउट फुटबल प्रतियोगिताको उपाधि बिमलनगरमा रहेको सिद्धगुफा युवा क्लवले हात पारेको छ । तनहुँको बन्दिपुर गाउँपालिका वडा नं १ मा स्वर्गिय सुक बहादुर कपालीको स्मृतिमा छपेली साँस्कृतिक युवा क्लब को आयोजनामा पौष २२ देखि आठौं छपेली खुल्ला सेभेन ए साइड नकआउट फुटबल प्रतियोगिता सुरु भएको थियो ।
मघ १ गते आईतबार भएको फाईनल खेलमा आयोजक छपेली युवा क्लब र सिद्धगुफा युवा क्लव बीच भिडन्त भएको थियो । निकै प्रतिस्पर्धात्मक खेलमा सिद्धगुफा युवा क्लवले अन्तिम मिनेटमा गोल फर्काए पछि निर्धारित समयमा एक – एक गोलको बराबरी भएको थियो । थप समयमा कुनै गोल हुन नसकेपछि खेल ट्राईबेकरमा धकेलिएको थियो ।
ट्राईबेकरमा आयोजक छपेली युवा क्लबलाई सिद्धगुफा युवा क्लवले ४ – ३ गोल अन्तरमा सिद्धगुफा युवा क्लव विजयी बनेको छपेली साँस्कृतिक युवा क्लब को अध्यक्ष बिजय रानाले जानकारी दिए । सिद्धगुफा युवा क्लवले उपाधि सँगै नगद १ लाख ११ हजार १ सय ११ सहित कप, मेडल र प्रमाणपत्र प्राप्त गरेको छ । उप–विजेता आयोजक टिमले नगद ५५ हजार ५ सय ५५ सहित कप,मेडल र प्रमाणपत्र प्राप्त गरेको वडा नं. १ का वडा अध्यक्ष शिवकुमार श्रेष्ठले जानकारी दिए ।
त्यस्तै, भेट्रान्स तर्फ ३० वर्ष भन्दा माथिका लागि प्रथम हुने काहुँमिलन झापुटारले पुरस्कार स्वरुप भेडा सहित मेडल र प्रमाणपत्र हात पारेको छ भने द्वितीय हुने सामना तुरतुरेले पुरस्कार स्वरुप बोका सहित मेडल र प्रमाणपत्र प्राप्त गरेको छ ।
खेलमा काहुँमिलनले सामनालाई २ – ० गोल अन्तरले हराएको थियो । उत्कृष्ट खेलाडी सिद्धगुफा युवा क्लवका सचिन थापा भएका छन् भने अरोन एफसी आँबुखैरेनी अनुशासित टिम घोषणा भएको आयोजकले जनाएको छ ।